لو سمحتوا يا شباب، بدي اسمح لنفسي آخد من وقتكن خمس دقايق، تا خبركن قصة. ء
قصة قديمة بس حلوة، عن دجاجة تحولت إلى ديك. ء
القصة حلقة من سلسلة "مغامرات الدجاجة غاندي". وعنوان الحلقة: "أنا الديك أبو عنتر" ء
كان يا ما كان ... بقديم الزمان، كان في دجاجة بيضا اسمها "غاندي". ء
دجاجة صبية وحلوة منخارها بالسما...كانت تمشي وتتغندر، اسمها غاندي بس الكل كانوا يدلعوها ويسموها "الغندورة". ء
كانت غاندي، الغندورة، عايشة بقن زغير، بتحبو كتير وبتعتني فيه. يعني بنت ناس وآدمية، وناطرا نصيبها... وحياتها من القن عا الحقلة ومن الحقلة عا القن. ء
وبيوم من الأيام، بليلة ما فيها ضو ٌ قمر ... إجا الأسد عا الحقلة يللي فيها قن غاندي. ء
أسد كبير ... سنانو بيض وكبار ... ورقبتو طويلة كمان. ء
إجا وقعد قدام القن ... بهالحقلة قدام قن غاندي. قعد وصار يزمجر ... عع ! عع! ء
وكان مبين أنو قعدتو طويلة. فرش حالو وقعد عا ها الأرض، وهات حدا يجي يقيمو! ء
غاندي كانت أول مرة بتشوف أسد. بالأول فزعت وصارت ترجف. بس سبحان الله، ربنا ما بيترك حدا من دون رحمتو. بعتلها لغندورة هونيك ديك، قوي وفصيح، اسمو فرعون. ء
ديك ولا كل الديوك. فصيح ولا أفصح من هيك، راسو كبير، ومبين عليه انو عقلاتو ترس. ء
شجعها لغاندي وطمنها، وقالها بوجودي ما تخافي. إذا هوي أسد، أنا فرعون....وإذا فكرو ياكلك، أنا باكل أبوه، وبأسوأ الأحوال، إذا ما قدرت عليه لا سمح الله، مابخلي ياكلك قبل ما يكون أكلني أنا قبلك. ء
أعجبت الغندورة بالديك فرعون، وحست معو بالطمأنينة. وحبتو وتجوزتو، وجابت منو 8 صيصان. وصارت تربيهن هي وجوزها فرعون أحلى ترباية. ء
بس هالأسد... أوف من هالأسد، منغصلها عيشتها لغاندي، ومش عم يعرف الله يلهمو يفل عن سماها. قاعد بهالحقلة ومادد اجريه... وبس ما ينام يا لطيف الشخير...الله وكيلك ما بيخلي حدا ينام... وبيخوف الصيصان، يللي ما كانو قدرو يكفو المشوار لوما الله بعتلن بي متل هالبي، وأم حنونة متل غاندي، كل ما بدها تنيمهن وتنسيهن هم الأسد، بتصير تغننيلهن هالصيصان... ترك ترك.. شو حلوين ... ترك ترك... عم بيدوروا حول امن مبسوطين... ترك ترك... وانتو بتعرفو الكفاية. ء
كان فرعون أحب عا قلبو، يكنفش ريشو قدام الغندورة. كان كل يوم من عشية، بعد ما يتأكد أنو باب القن مسكر منيح، يبلش يحركش بالأسد ويستفزو. أقل كلمة يقلو اياها بدي كسرلك راسك يا واطي. ايه والله، وغندورة تنبسط بشجاعة زوجها، وتصير تدعي الله يفرجها ويدب الخوف بقلب الأسد عا هالكلام الكبير العم يسمعو، وبركي بيلهمو يضبضب كلاكيشو ويمشي. ء
بس لسوء الحظ هالكلام ما كان ينفع. كان الأسد كل ما يسمع هالحكي يبلش يزمجر، وفرعون يصيح قبالو. الغندورة والصيصان يفزعوا شوي، بس لما يشوفوا البابا واقفلك هالوقفة مفرعن وعم يصيح، تشتد براغيهن، ويصيروا يصيحوا معو على قد ما بيعرفوا. ء
طالما باب القن مسكر منيح، الصياح بلاش، وما عليه جمرك. ما كان فرعون وصيصانو يوقفو صياح عا الأسد لحد ما هو يزهق ويقوم ينام، وعم يقول بحالو بسيطة، بيعلقوا بإيدي شي يوم. ء
ومرأت الأيام، لحد ما مرة، تخرب باب القن. يعني بلا طول سيرة، عا كتر القتال بين الديوك، تصدع القن، وانخلع قفل الباب. خافت غاندي عالصيصان وجن جنونها. ما كانت تقدر تنام لا هيي ولا الصيصان. بس فرعون عندو خبرة وما فقد أعصابو. شو عمل؟ فقعلك هونيك خطاب، عنتر بزمانو ما فقعو. قلو للأسد ليك، إذاكان فكرك أنو رح اهرب منك وفل، أنا ما بفل لأنو هيدا مش من شيمي. أنا باقي هون ورح موت هون، وإذا كل الدجاج وديوك الكون هربت من هون، رح ابقى وحدي وواجهك وحدي وموت أنا وياك هون. ويكون بعلمك أنو هون رح بتكون مقبرتي أنا واياك. ء
سمعت غاندي هالحكي ونيمت الصيصان ونامت، وقالت الصباح رباح. عا أساس فرعون سهران حراسة عالباب، وما عم ترفلو جفن. ء
فاقت غاندي الساعة سبعة الصبح يا دوب نايمة ساعتين، عا ضجة وصريخ وزعيق وتكسير وصوات عجيبة غريبة. ء
شوفيه... يا عدرا شو فيه؟ ء
فتحت عيونها وما صدقت اللي شافتو. الدنيا خربانة. الأسد بالقن، عم يكسر ويطحبش ويسفك دم... ء
عم يقتل بها الصيصان واحد ورا التاني. وكل ما نتف صوص، بيصير يزمجر ععع وعععع ويهجم عالصوص التاني. ء
صارت غاندي تصرخ. فرعون!!! فرعون!!! فرعون!!! ء
الأسد يكسر ويطحبش ويتشفى بها الصيصان، وغاندي تعيط لفرعون ومش مصدقة عيونها. ولك وينك يا فرعووووووون!!! تعا شوف ولادك يا فرعون!!!! ء
فجأة سمعت صوت فرعون، عم يجاوبها من راس التلة. ء
قلها يا غاندي كبري عقلك...أنا ديك، وهوي أسد. ء
هلق من عقلك مصدقة انو الديك بيقدر يوقف بوجه الأسد؟؟؟ ء
أنا بعرفك متعلمة وذكية يا غاندي، وأكيد بتعرفي أنو بحياتو الديك ما وقف بوجه الأسد. ء
اتكلي عا الله وانصاعي لأوامرو، وشوفيلك طريقة تتفاهمي انتي واياه. أنا هلق مسافر ومين بيعرف... يمكن الله يكون مخبييلنا انو نرجع نشوف بعضنا. ورح ابعتلك مكاتيب. يللا باي. ء
سافر فرعون، وصارت غاندي عايشة بالقن هيي والأسد. بيصبرها الله. ء
بس كانت غاندي مخلصة لزوجها فرعون. 15 سنة عاشت مع الأسد بنفس القن، تاكل معو وتنام معو وتبيضلو كل بيضة دهب 17 قيراط... بس صدق أو ما تصدق، بيشهد الله ما كانت تعطيه وجه. فقعتوا وما كانت تعطيه وجه. حتى أمرار هني وسهرانين كان يغمزها ويجرب يفتح معها حديث حلو، كانت تديرلو ضهرها وتصير تبقبق هيك عالواطي وتقلو "نووو"! "نوووو"! ء
ما فيك تنكر أنو تا دجاجة تقلو للأسد وهيي معو بالقن "نو"، بدها كتير شجاعة وايمان. كانت عم تقاوم عا قد ما بتقدر. يعني مقاومة سلمية، لأنو العين بصيرة والإيد قٌصيرة. ء
فرعون كمان كان ابن أصل، وكان عم يضل يراسلها لمرتو. وكان كل ما يسمع خبرية انها بلشت تظبط أمورها مع الأسد، يبعتلها مكتوب حب وغرام ويكبرلها راسها. تقوم تصيرتاني يوم تتمغنج هيك عالأسد. تعملها كم حركة غنج زغيرة وتاخد كم صورة قدام الكاميرا تا تبعتن لزوجها فرعون، حتى تفرجيه قٌديش هيي تقيلة وانها بعدها بتحبو. يضل الموضوع هيك أبو شي ساعة ساعتين زمان، لحد ما يجعر فيها هيديك الجعرة، ويفهمها أنو دق الجرس وخلص وقت اللعب. ء
لحد ما مرة، اجو صحاب الحقلة عافو سماهن من الأسد، وجابولو وحش كبير، أكبر منو بشي سبع طعشر مرة. وصار وضع الأسد مش مرتاح كتير، وعم يطلبو منو صحاب الحقلة يفرجيهن عرض كتافو. ء
بلش الأسد يفكر بطريقة هيك يحفظ خط الرجعة. قٌلك يمكن لازم اخلي الساحة شوي هلأ، لكان هالوحش زهق وفل، أو بلاقيلي معو شي طريقة نتفاهم وبرجع. أخد من غاندي عنوان زوجها، وبعتلو مكتوب. ء
قلو انتا يا فرعون ابن أصل. أنا محشور، وبدي مساعدتك، وإذا بتمشي معي، رح أعملك ديك الديوك. عندي مشكلة زغيرة مع هالوحش بدي حلها. أصلاً أنا فيك أو بلاك فيي حلها بخمسين طريقة بس أنا حبيتك وبدي ياك تستفيدلك شوي من الموضوع، وبدي أعطيك فرصة تحقق طموحك. ء
رجع فرعون عا القن، عا حصان أبيض. رجعو الأسد بنفسو. بعتلوالحصان يجيبو من عا درج الباخرة، اللي فرشلو اياه سجاد أحمر، وعملو حفلة استقبال وتشريفات عا باب القن، بالمدفعية والرشاشات، ودق السيوف والألعاب النارية. ء
استقبلتو غاندي لزوجها بالبكا ودموع الفرح، مش عارفة كيف بدها تشكرو وتمدح فيه. ومن كتر فرحتها وانفعالها، ما لاحظت حتى أنو من وين هالصحبة بينو وبين الأسد تا يستقبلو ها الأستقبال ويعملو ها التشريفات. وحتى لمن كان يجي براسها الوسواس، كانت تخزي الشيطان وتقول، بالنهاية أنا دجاجة، مش شغلتي أعرف كيف الديوك والأسود بتتفاهم بين بعضها. أصلاً شو جاييني إذا تفاهمو أو ما تفاهمو؟ خليني أنا دجاجة بحالي، وخلي الديوك والأسود بحالهن. ء
وقبل ما يفل الأسد، عرفو لفرعون على ديك تاني قوي كتير، اسمو أبو علي. ديك كبير... شو كبير؟ راسو بالسما فوق الغيوم، واجريه بيهزوا الأرض. وشو كمان؟ حامل عاكتافو بارودة، وصاروخ. ء
البارودة، كل ما صاح أبو علي صيحة وصار يهز بأصبعو، بتصير البارودة تقوص وبتغطي السما بالرصاص، وما بتوقف تا يرحلو شي قتيلين تلاتة بالرصاص الطايش. قال هودي دبيحة عا شرف صياح أبو علي، لأنو ما بيصيح الا بالمناسبات الكبيرة وصيحتو بتوصل لورا المحيط الأطلسي والخليج الفارسي... ء
الصاروخ، لاحق راس أبو علي عالدقة. كل ما برم أبو علي راسو صوب الجنوب، بيبرم الصاروخ صوب الجنوب. وكل ما برم أبو علي راسو صوب الشمال، بيبرم الصاروخ صوب الشمال. أبو علي ما بيحب يستعملو للصاروخ، وبعدو لهلأتني ما فهم ليش كل ما حدا طلع بوجو الصاروخ، بينقذ وبيصير خايف... مع انو طلع عا لسانو شعر هو ويقول انو مش رح يفيلتو للصاروخ، بس يا عمي هالناس شو جبانة. ء
وصاهن الأسد لفرعون وأبو علي ببعض قبل ما يفل. ء
قلهن وينكن، أنا هلق رايح مشوار زغير وراجع عن قريب. رح احكي كلمتين مع الوحش وأرجع. أنتو بتعرفوا كل واحد شو مطلوب منو. بدي بس ما أرجع شوفكن مرتبين الوضع مزبوط. وإذا بعرف انو بغيابي حدا منكن لعب بديلو، ايه والله لأمعطو ونتفو تنتيف. على كل حال طلعوا حواليكن منيح واتعظوا، وقولو لحالكن: ما متت ما شفت مين مات؟ ء
راح الأسد عالتلة القريبة، وصار يراقب الوضع من هونيك. وكل يوم بالليل، كان يتسلل عالحقلة يقتل واحد من يللي شحطوا ويهرب. والعجيب، انو صار كل ما حدا يحكي عليه كلمة أو يقول لازم نحطلو حد، حزرو مين يفز متل المجنون تيدافع عنو ويمسح الأرض بيللي بيحكي عليه كلمة؟ ولك ايه! نعم! الغندورة ما غيرها! ء
الغندورة، من بعد ما فل الأسد، خرقلها فرعون براسها انو شو؟ انو قال هيي يللي طفشتو للأسد. 15 سنة نايم معها بالقن، وعم تبيضلو دهب...وآخر شي قال فزع منها وفل. بس ياريت قلها بس انو فل. قلها انو فل وحلف مية يمين انو ما بيرجع على ها القن لو بدهن بيملكوا اياه هو والمزرعة كلها، والجبل كلو بضهرن. بحياتو ما ممكن الأسد يفكر يرجع. ليش؟ لأنو الغندورة ربتلو القمل براسو. يعني خلص، بح أسد. يوك، تبخر الأسد وما ممكن بحياتو يرجع. نامي قرة العين يا غندورة. ء
بدكن الحقيقة؟ الغندورة ما ركبت كتير براسها انو هيي طفشتو للأسد. بس هيي قالتلك شو، طالما هلق عندي بوي فرند جديد اسمو أبو علي عندو هالبارودة وهالصاروخ، وأنا كل عمري جانحي مكسور، عندي تم يبقبق ما عندي تم يحكي... والعمر غفلة، خليني عشلي يومين حلوين، وجرب عيشة الديوك كيف بتكون. ء
تنكرت غاندي الغندورة، بتياب ديك. طرشتلك حالها بردقاني، غيرت صوتها ولهجتها، وركبت تاج عا راسها، وحتى غيرت اسمها كمان. بصراحة ما عاد يعجبها اسم غاندي. بيذكرها بأيام الفقر والبؤس والخوف. شو سمت حالها؟ أبو عنتر. ايه والله هيك، غاندي الدجاجة الغندورة، صارت ديك وصار اسمها أبو عنتر!!!! ء
وشو كمان، استعارت البارودة من أبو علي، ونزلت عمرت لحالها قن بساحة اللعازارية. شو قن... شوادر النور وخيم السيرك بيغارو منو. قن بيجي أكبر من ديزني لاند. كحشتلك كل شي في عالم وعمال ومطاعم من الساحة، سكرت الطرقات ومواقف السيارات، وعملت قن على مساحة كل الساحة... وصارت تنام فيه كمان. ء
ايه والله العز للرز. زمن والله زمن يا غاندي. عفواً قصدي يا أبو عنتر. مش بس نسيت قنها يللي قضت عمرها فيه، نسيت كمان صيصانها يللي مصلهن دمهن الأسد وديكو أبو علي. نعم أبو علي، يللي صار البوي فرند الجديد تبعها. ء
يسترجي حدا يذكرغاندي بالصيصان، أو يغلط ويقول قدامها انو قتلهن الأسد. أو متلاً الله يغضب عليه ويذكرها انو بعد في عند الأسد شي صوصين تلاتة، محتفظ فيهن تا يمرن ولادو فيهن عا الكاراتيه. الله يساعدو اللي بيخطر عا بالوا يجيب قدامها ها السيرة. ايه والله بيعلق بلسانها وبتمسح الأرض فيه وبتحسب الله ما خلقو. هيدا إذا ما جابت بارودة أبو علي وطخ... نفضتو ضرب براسو جابتو عا راس التلة االي هرب عليها بالزمانات فرعون. ء
غاندي اليوم، صار اسمها أبو عنتر، ساكنة بقصرها باللعازارية، وبتنام بكل طمأنينة وأمان، أمان ربي أمان. ء
وينك وين أيام الرعب والقلق والنوم نص نوم. اليوم عم تنام بقصر، وأبو علي مستتها ومأمنلها كل شي بتحلم فيه. حراسة ببارودتو 24 ساعة، حاططلها خدم وحشم، مشكشكها بالدهب واللي بدها اياه بتقول كن فيكون. كل شي مطلوب منها انو شو؟ انو إذا حدا اجا هيك بدو شغلة زغيرة من الأسد وأبو علي وبدهن يزحطوه، بيقولولو بدك تشوف الموضوع مع الست الغندورة. ء
هه... بس الغندورة، صار اسمها أبو عنتر. لا عاد حدا في يشوفها ولا حدا فيه يحكي معها كلمة. ء
توتي توتي, خلصت الحدوتي. خبرتكن حكاية الدجاجة يللي صارت ديك. ء
دجاجة كان اسمها غاندي، صارت ديك اسمو أبو عنتر. ء
شكراً لإصغائكم، وإلى اللقاء مع مغامرة جديدة من مغامرات الدجاجة غاندي. ء
وتصبحون على ألف خير. ء
hg][h[m yhk]d ,hg]d; hf, ukjv
الإهداءات
آخر 10 مشاركات
| 
|
الدجاجة غاندي والديك ابو عنتر
رد: الدجاجة غاندي والديك ابو عنتر
العرض العادي
